鄭中基前晚紅館騷來到第三場，請來昔日烹飪遊戲節目《美女廚房》的兩位拍檔梁漢文和方力申做嘉賓。三位《美女廚房》元老在台上吹水期間，提到去年無綫播出第三輯《美女廚房》都有意見，方力申更開口寸節目造假，鄭中基自度節目應改為「美男廚房」及過檔ViuTV播出，梁漢文索性說自己搞新電視台自己播。
鄭中基前晚於紅館，舉行第三場香港站「One More Time世界巡迴演唱會」。烹飪遊戲節目《美女廚房》是鄭中基在電視界經典之作，前晚他找來當年曾一齊主持的梁漢文和方力申做嘉賓。提到去年播出第三輯《美女廚房》，他們三人冇份拍，但觀眾反應卻欠佳，他們亦忍不住連環寸無綫。
呻冇女友
方力申、鄭中基及梁漢文前晚一同現身，一連唱了兩首當年《美女廚房》的歌曲，然後齊聲大叫節目的口號：「美女廚房食咗先講！」梁漢文問觀眾：「有冇掛住我哋先？定掛住啲坑渠水味意粉？」方力申接着問：「定係你哋最鍾意啲屎味魚蛋？」鄭中基問現場觀眾是否十年沒看《美女廚房》，梁漢文笑說：「最近有做㗎！」方力申立即接口寸爆：「嗰個係假㗎。」之後，梁漢文重提當年被封「整容三嬌」的女子組合Freeze亮相《美女廚房》時，被方力申意有所指她們的身材造假，梁漢文笑說：「你都癲癲哋，以前你話啲奶假，𠵱家就話人哋個節目假？」
鄭中基提議三人再做節目，不過要改名為「美男廚房」：「因為我哋已經有家室，唔可以亂咁食嘢。」方力申即時有意見：「你哋兩個就上晒岸，升晒呢，升做人老竇、做人老公，我升乜吖？我single呀。我唔single時安份守己，今日我single就食自己，求吓你哋啦！」鄭中基笑說：「你誤會咗，我哋講緊嘢食。」方力申即時反駁：「總之唔好理，我真係好需要，好耐冇搞，真係好想搞，搞番個節目！」說罷，梁漢文及鄭中基即時贊成，方力申續說：「等我聽日返去TVB傾吓。」鄭中基接着說：「咪住，唔一定係TVB嘅，𠵱家仲有ViuTV。」梁漢文就稱不如自己搞電視台：「名我都諗埋㗎喇，就叫做T Viu B！」
自組網台
完騷後，方力申表示對台下反應感到意外：「原來有好多觀眾喺網上重睇，令我哋吸納咗年輕小朋友嘅觀眾。」問到是否代表他們會再搞節目，梁漢文說：「搞個台唔係冇可能，最多搞個網台，做我哋三個人嘅嘢，但呢段時間大家都各自有自己嘅嘢，好睇緣份。」其實，鄭中基的太太余思敏婚前曾是有線的主播，11年誕下女兒Emma後淡出，不過鄭中基卻多次撐太太復出幕前，今次鄭中基叫拍檔過檔ViuTV，眼中像是沒有無綫。
採訪：曹家誠
攝影：仇志德