• HTML tutorial
  • KMRB AM1430 粵語廣播電臺      
優閒娛樂, 蘋果日報

食飯盒重聚論《喜劇之王》 田雞霞姨袁富華Sunny哥 電影精神

 

今年是電影《喜劇之王》20周年,除了記得周星馳飾演的尹天仇,和張栢芝飾演的柳飄飄外,還會記起哪位小人物?剛踏入豬年,《蘋果》找來戲中幾位經典小人物來聚一聚,包括演洪爺手下的田啟文(田雞)、演黑幫的袁富華、「霞姨」B Lee及「Sunny哥」阿濤,四人20年來首度聚首,除了重提拍戲趣事,更一同食飯盒,田雞還提到電影行要團結的精神。

中國人的傳統習俗,大年初三稱為「赤口」,《喜劇之王》中的田啟文、袁富華、「霞姨」阿B及「Sunny哥」阿濤,相隔20年難得聚頭,你一言我一語,說話聲此起彼落,如應了年初三的赤口般。更難得的是,他們重演當年經典一幕「臨時演員都係演員」的戲份,四人由排練到拍攝,不消半小時便完成,全因他們都是專業演員。談起當年拍攝趣事,袁富華(Ben哥)直言︰「以前我哋做舞台劇好難出去拍電影,我第一部參與嘅電影係《人間有情》,之後就係《喜劇之王》,後來《少林足球》都有搵過我,但我就唔到期拍唔到。」

久違了的阿濤笑言當年純粹過戲癮參加訓練班,他原本是任職銀行,閒時愛攝影和拍微電影,阿濤笑言︰「其實我係參考副導演Sunny(陸劍青),𠵱家佢係大導演,佢先至係真正Sunny哥。」Ben哥在旁笑說︰「知你扮Sunny戴埋帽,一睇就知你係Sunny look。」田雞接着說︰「佢扮周星馳仲似。」大家起哄叫他表演,阿濤即星爺上身︰「臨時演員都係演員。」演罷,贏得在場掌聲。

Sunny回想當時與周星馳演對手戲︰「呢段係好好嘅回憶,好記得畢業禮嗰日,周生頒獎畀我喺我耳邊講︰『聽日開工。』嗰日一開工就要扯佢頭髮,我好緊張,背晒三頁紙對白,點知去到現場一句都唔要。」

困獸鬥拍戲

說起臨時改劇本,Ben哥指當年他那場「你唔係外賣仔」的經典場面,原來都是臨時更改,Ben哥說︰「我嗰場戲都冇劇本。」此時田雞插口說︰「原本場戲唔係咁,係舞台劇表演,後來先改咗卧底戲。」Ben哥續說︰「人哋話我面色好白,當時困住間屋度拍咗好幾日,返去沖完涼又嚟拍過,唔兇狠都變咗兇狠。場戲又爆破又要開槍,我唔識開槍,又唔識㩒反應彈,我好緊張。」

《喜劇之王》中,令人印象最深的是霞姨,早前阿B再以霞姨形象拍廣告,對於當年沒有繼續在娛樂圈發展,她說︰「自己都想做演員,但又要維生,呢行唔係成日有工開,所以我冇刻意唔做,亦冇刻意繼續做。」

 

茄喱啡做起

當年田雞是茄喱啡,時至今日他更成為香港電影工作者總會會長。他自己也感觸說︰「我有雙重身份,又係幕前又係幕後,做幕前自己可唔可以做好啲呢?做幕後就想啲嘢拍快啲,唔好嘥錢,有時都好矛盾,但喺片場好享受食飯盒嘅日子,有飯盒食即係有工開。」田雞近年開始培育新血,希望感染其他人:「電影行需要百花齊放,每人有發揮,電影精神,需要團結,每個人唔好睇少自己。」

談到新一年有何展望?田雞率先說︰「希望Ben哥再下一城,金像獎喺12號公佈入圍名單,你入男配角係實至名歸。」原來公佈當天是Ben哥正日生日,大家笑言是喜上加喜。Ben哥希望來年人人都身體健康,至於Sunny哥希望自家製作的微電影,可以參加影展,而阿B則希望大家享受人生,業界拍多些香港電影,她笑稱︰「要靠田雞啦!」
採訪︰羅婉玲
攝影︰林德雄

Previous ArticleNext Article

留言分享